dä summer isch langsam wieder da, das merkt mä dra das äs ein i dä fingerspitzä chribälät will unsereins natürli wieder wett go wakesurfä.. zum das machä chunnt mmis phase5 board etzt konkuränz vomänä liquidforce custom thruster..
das weekend gah ich de im tessin i dä sportbase go testä.. freu mi riesig.. reportä den am mäntig oder so wiäs xi isch..
so, s weekend naht, isch zyt für än neuä post im blog..
s staht wieder mal so einiges uf äm programm.. bacardi mojito party for 25 hours.. wird sicher geil, den gits no chli z hüüratä und ich därf mal wieder än aazug aleggä.. s wätter isch ja glaub nid so toll, doch das söll eus nid vom fyrä abhaltä..
a dä pfingstä ischs ja scho supper xi..
also wünsch eu allnä viel spass and take care..
s git so äs alts sprichwort wo behauptät “pfingstä gahts am ringstä” drum freuäd mir eus doch all uf d pfingstä.. das vorallem bi däm wätter..
i früänerä jahrä hät mä d pfingstä ja jewiils no a dä thur verbracht, 3 täg im zält mit bier, ässä und suschtigä sachä wo s läbä agnähm gmacht händ.. aber eigentlich häts immer grägnät..
diä pfingstä isch s wätter ja wiä xeit sehr guät und ich hoffä drum das ich ändli chan d wakeboard saison iilüütä.. s wird langsam zyt, han doch scho “auf dem board steh” entzug.. wobie bi dä momentanä ca. 11grad wassertemparatur wo dä see im momänt hät bruuchts scho einiges a überwindig.. da hilft glaub nid mal än neopren.. 
ja nu, mir wärdäds xeh.. susch gaht das weekend ja au party mässig einiges ab.. s wird eus sicher nid langwiilig..
ciao zämä, s weekend büütäd alles was mä wett.. chli apero, chli party, chli relaxä, chli fiirä und chli ladys.. äs isch wiä immer wieder mal viel zviel loos.. was da wäre la boum im kauflüütä festsal, 6 years haustanz im mascotte, flashdance im bolero urania27 und susch na so einiges.. muäs mich na genau entscheidä was ich machä, aber s wird sicher wieder mal party.. ich bring den mal na än update.. viel spass eu allnä und hebäds guät.. rock on
so, am samstig abig hämmer eini vo dä geilschtä sessions überhaupt in vals erläbt.. zerst mal, s werdät kei nämä gnännt ussert am jürg sinä.. die andärä wüssed all wer däbie xi isch und das isch guät so.. also es kam zu dieser session wie es eben kommen musste, mir sind unverhofft und spontan uf vals go znacht ässä, will mir mit äs paarnä abgmacht händ.. s ässä im glenner isch dä hammer xi.. pizokeltopf nur z empfehlä.. oder au s entrecote mit polenta.. *feinxi* au dä wy und dä grappa sind sehr guät xi.. nach äm ässä, unverhofft id gada bar, und was händ eusi augä det xeh? än nagelstock.. also loos, naglä was das zeug hält.. ich han zum glück niä verloorä.. und zmitzt im spiel chunnt unverhofft dä jürg däzuä.. dä nagelmeister vo vals.. ah ja, bevor is vergissä, än 5 liiber hämmer au na uf dä bar verewigt.. (wüssed ihr eigentlich wiä lang das äs gaht bis mä än 70er nagel dur än 5liber ghauä häsch) irgänd wänn zu spater stund simmer den nai g’s (uusgsprochä cheese) (han ich das richtig verstandä mir sind imänä club xi wo chääs heisst??) det isch den d party so richtig geil wiiter gangä.. tanzä mit äm spiegel etc. eifach hammer.. irgend wänn isch den aber zyt xi zum heigah und was uf äm heiwääg alles na passiert isch, das wüssäd halt nur diä wo däbii xi sind.. nach äs paar stund isch den aber wiiter gangä und zwar mit zmittag/zmorgä im glenner.. (do you remember, muäsch immer det ufhörä wot agfangä häsch..) oder seit mä däm kater früästück? uf all fäll hämmer eus fast z tot glacht bim ässä wil mer so schön über’s erläbtä händ chönä brichtä und däzuä no diä fottänä.. aber ebä wiä xeit, diä sind all zensiert.. so, ich chas allnä nur empfehlä, gönd mal uf vals id gada bar und lönd am abig sin lauf..
so, etzt isch den wieder zyt zum über s bevorstehendä weekend nadänkä..
so, ich bin eu no äs update beträffänd pleasure spring session in laax schuldig.. erst mal s isch dä hammer xi.. am fritig simmer i dä crap bar xi.. diä hät ja am sunntig s letscht mal offä gha, aber dadäzuä später meh.. den hämmer in klupp (ehemals flem massiv) uf flims wellä, aber de isch leider chli vollä xi.. glaub öppä 230 lüüt.. den simmer halt zerscht i dä arena eis go schnappä und händs chli später namal probiert.. im klupp isch neon party xi, das heisst all lüüt sind neon farbig agleit xi.. ussert mir natürli, da mir vo nüüt gwüsst händ.. isch bis lang i dnacht inä gangä und am nächstä tag hämmer dementsprächend glittä.. mir händ eus aber nid dävo abbringä lah glich uf dä berg zgah.. dobä häts paar spinner gha wo über s noname inä gumpät sind.. mit äm snowboard verstaht sich.. zum apresski natürli wieder id crap bar.. und in usgang uf vals.. aber für das gits än eignä iitrag.. am sunntig hämmers leider nümm uf dä berg gschafft, däfür hämmer a dä ustrinkätä vo dä crap bar wos jetzt abriisäd chönä mitmachä.. bilder werdäd no na glieferät..
so, s weekend staht wieder mal vor dä tüür und mir gönd no s letscht mal diä saison uf laax.. na chli butzä in sagogn und so.. in laax isch das weekend pleasure spring session wird sicher ä geili sach.. s wätter macht halt leider nid so mit, aber was sölls.. besser als in züri umä sitzä.. so, gnüüsäd s weekend..
so, s weekend staht wieder mal vor dä tür.. mal luägä was so abgaht.. ich dänkä ich schriib den am mäntig äs paar details däzuä..
what am i doing...
